Javier Wolter Celebrates 25 Years at CMB

Durante e celebracion di despedida di Bill Carson na Tierra del Sol Diaranson pasa hunto cu e coleganan di Caribbean Mercantile Bank N.V. tambe a celebra e 25 aña di servicio di e conocido bankero Javier Wolter. Den mitar di July Javier Wolter lo tuma over e maneho di e banco popular y dinamico aki como e General Managing Director.

Javier Wolter a cuminsa cu banco na aña 1983 despues di termina su studio na Universidad di Sur di Florida. Na 1985 e la tuma un aña liber di trabao y a logra su Master's den Business Administration for di Universidad di Miami. Den e ultimo 25 aña e la cubri practicamente tur posicion di gerencia di e banco y awor esun di mas halto.

Pa hopi aña caba Javier Wolter tabata y ta presidente di otro organisacionnan cu no directamente vincula cu CMB manera voorzitter di basisschool "De Schakel", Parke Nacional Arikok, y alabes miembro di hunta di directiva di Royal Sun Alliance, AHATA y Ike Cohen Charity Foundation. Tambe e ta bon conoci pa e varios biaha cu e tabata presidente di Arubaanse Bankiersvereninging. Den e deporte di ciclismo tambe e ta bon conoci.

Riba e potretnan por mira con su coleganan a decora su oficina pa e dia special aki y alabes momentonan na unda Bill Carson ta honra Javier Wolter y su esposa Sylvia hunto cu su famia. Pabien Javier Wolter cu bo 25 aña y tambe cu bo promocion como General Managing Director.